Haba
22 Januari 2002 – 22 Januari 2022
Assalamu’alaikum Warahmatullahi Wabarakatuh
Kru Seumangat !!!
Bandum pudjoë meuwoe keu Po teuh Allah. Seulaweuët dan saleuëm njang lambông ta peu-ét keu Pang Ulèë geutanjoë, Nabi Muhammad Sallallahu ’alaihi wasallam beuseurta deungon ahli keuluarga dan sahabat2 droëneuhnjan.
Bak watee ta seutot peudjuangan Angkatan Atjeh Meurdehka dan GAM ateueh tanoh meu-deelat Neugara Islam Atjeh, salah sidroe nibak peumimpin sayap militer Angkatan Atjeh Meurdehka njang karismatik dan berkaliber serta peunoh deungon kontroversial nakeuh Panglima Tengku Abdullah Syafi’ie njang leubeh mesra dji-hoi le ureueng Atjeh Tengku Lah. Beliau njan nakeueh sidroe Panglima Angkatan Atjeh Meurdehka njang that dji-horeumat dan dji-seugan uleh kawan dan lawan.
Seumoga beuneupeuduëk sadjan aulia dan anbija, beuneupeu-ampôn dèësja dan beuluwaih kubu. Hana tuwô tjit di geutanjoë saban2 ta peutrôk sikrèk Al fatihah keu droëneuhnjan beuseurta deungon bandum ulama2 njang ban neuwoë bak Allah chususdjih dan sjuhada2 njang laén. Al fatihah.
Beliau lahe bak uroe 12 Oktober 1947 di Wilajah Batee Iliek (Bireuen) dan teuma dudoe neu meu-kawen u daerah cubo Pidie Jaya sigolom Tengku Tjhik di Tiro Hasan Muhammad neu angkee droeneuh njan sibagoe Panglima Angkatan Atjeh Meurdehka.
“Di Nanggroe Atjeh dumpeue geu-uko deungon seunipat Islam. Islam nakeuh bahagian njang handjeuet peu-meungkleh nibak droe Bansa Atjeh, lagee dzat handjeuet peu-meungkleh ngon sipheuet. Keue geutanjoe Atjeh, Islam meu-makna Atjeh dan Atjeh meu-makna Islam. Meunjo Atjeh saboh pawon, maka blahdeh nibak pawon njan njankeuh Islam. Atjeh nakeueh saboh bansa njang geu-peudong ateueh neuduek Islam, dan geu-hudep deungon Islam. Njan keuh meunan ka leubeh seuribee thon dalam seudjarah geutanjoe njang ka meu-tuleh. Uleh ibnu Chaldun ka geu-tuleh dalam kitan geuh njang mesjeuhu, Muqaddimat (Abad keu-15) bahwa bak watee gobnjan, bansa Atjeh nakeuh bansa Islam njang paleng kong meu-mat bak agama Islam dan keuradjeuen Atjeh nakeuh kekuasaan Islam njang paleng raya kuasa di Asia-Timu. Bahthatpih geutanjoe djinoe ka gadoh keumeurdekaan teuh siat sabab peudjadjahan kaphe Beulanda dan kaphe Indonesia-Jawa, bansa Atjeh mantong geu-mumat bak Islam lagee endatu geuh djameuen kon. Trok-an Angkatan Atjeh Meurdehka handjeuet han phon that na saboh geurakan keumeurdehkaan Islam” (Jum Meurdehka, Wali Neugara Paduka Njang Mulia Tengku Tjhik di Tiro Hasan Muhammad, pp. 153-154)
Maka sabab njan keuh uleh Tengku Abdullah Syafi’ie that konsisten dan ichlaih bak neu mumat bak geunareh peurdjuangan fi Sabilillah untok peudong neugara Islam Atjeh njang teu glong ateueh ideologi peu-gisa keulai Deelat Allah dan Rasulullah SAW. Bak watee droeneuh ka dji-keupong dan dji timbak uleh Teuntra Indonesia Djawa maka bak watee njan droeneuh neu kheun keu salah sidroe peungawal droeneuhnjan “Njoe ka trok njang lon lakee. Njoe ka trok watee njang lon preh-preh”.
Karakter dan sipheuet alamiah Tengku Lah njang that ramah dan toe deungon masjarakat serta nasihat dan peuringatan droeneuh njan meu kumat dalam hate sibarangkasoe njang kalon dan deungo sampoe-an lahee rasa sajang dan tjinta masjarakat keu sosok Tgk Lah sibagoe Panglima Angkatan Atjeh Meurdehka. Meunantjit droeneuh njan that kong neu meumat bak aturan dan disiplin angkatan prang Atjeh Meurdehka dan hana neu-tem se meu sipade pih bak neu-peutimang amanah dan mandat njang ka neu-peugulam uleh Paduka Njang Mulia Tengku Tjhik di Tiro Hasan Muhammad.
Na haba angen njang dji-pot djikheuen bahwa Pimpinan Politik Gerakan Atjeh Meurdehka) GAM njang ban dji-angkee bak watee njan merasa kureueng seunang deungon peundekatan Tgk Lah njang hana neu meupakat sapeue deungon pimpinan politek GAM untuk peugot peurtemuan sitjara rahasia di teumpat njang meu-kleh deungon tokoh-tokoh politisi Indonesia, deungon artis dan deungon wartawan-wartawan untuk dji-wawancara.
Meunan tjit, bak uroe keudjadian dji-keupong dan seurangan ateueh kem Djiem-Djiem Wilajah pidie droeneuh reubah dji timbak uleh serdadu Sipa-i Djawa dan syahid di teumpat. Meunan peurumoh droeneuh njan Cut Fatimah sjahid tjit diteumpat meusigo deungon 2 droe peungawal. Keudjadian seurangan dan teumimbak njan djeuet keu saboh isu dan pembahasan njang kontroversial di kalangan pedjuang meu-seundjata njang seutia keu Tgk Lah, meunantjit dikalangan para simpatisan dan pengamat-pengamat lapangan mideuen prang bak watee njan sampoe-an uronjoe.
“Geutanjoe Atjeh nakeuh saboh bansa ateuh rhueng donja. Saboh bansa hudep sabe bahthat pih anggeeta sidroe-droe mate, saboh bansa teutap lagee sot, bahthat pih keuturunan meugantoe-gantoe, saboh bansa hana tuha, sabe muda, bahthat pih sidroe-droe anggeeta djeeuet keu tuha, sabab njan geutanjoe bansa Atjeh bak masa njoe saban tjit deungon bansa Atjeh bak masa 100 thon atawa 1000 thon njang ka u likot, atawa ukeue, endatu geutanjoe njang ka mate ka ta gantoe le geutanjoe, geutanjoe akan djigantoe le aneuk tjutjo njang akan lahe, meunan keuh trok an ache donja” (Atjeh Bak Mata Donja, Wali Neugara Paduka Njang Mulia Tengku Tjhik di Tiro Hasan Muhammad, pp. 57)
Kisah epik dan kepahlawanan Tengku Abdullah Syafi’ie @ Tgk Lah sibagoe sidroe nibak anggeeta bansa Atjeh akan djeuet keu bungong djaroe keu generasi-generasi pahlawan bansa Atjeh di masa ukeue sibagoe saboh tjara hudep bansa meudehka, tjara mate bansa mulia, kedisiplinan, integriti dan ichlaih dalam ta sambong buet peurdjuangan sutji fi Sabilillah njoe sampoe-an teu dong keulai kalimah tayyibah La’ilahaillah, Muhammad Rasulullah ateueh nanggroe pusaka peunulang endatu njang seb tjeudaih njoe, Neugara Islam Atjeh.
Djak saban-saban ta renungi wasiet tjeudaih njoe nibak Alm. Panglima Tengku Abdullah Syafi’ie untuk saban-saban ta peu gleh hate dan niet teuh untok ta sambong buet sutji peurdjuangan peu-bibeueh dan peu-meurdehka nanggroe Atjeh mulia dan meu-deelat njoe.
“Nibak saboh uroe watee ka neudeungo ulontuan ka sjahid, bek meurasa seudih dah patah seumangat. Ulontuan sabe munadjat keu Po Teuh Allah beu neu-djok sjahid keu ulontuan watee nanggroe Atjeh njoe karab meurdehka. Ulon hana meu lakee sapeue pih watee nanggroe Atjeh ka meurdehka”
Wallahua’alam Bisshawab.
Wassalamu’alaikum Warahmatullahi Wabaraktuh
Tengku Sulaiman Abdul Razak
Anggeta Madjeulih GAM Pusat
