Geurakan Atjèh Meurdéhka
Meudjeulih Geurakan Atjèh Meurdéhka Pusat
بِسْمِ ٱللَّهِ ٱلرَّحْمَـٰنِ ٱلرَّحِيمِ
السلام عليكم ورحمة الله وبركاته
Uroë njoë 12 thôn njang ka leupah, 3 Djuni 2010, salah saboh uroë njang that seudéh ateuëh bansa Atjèh, uroë geumadoh sidroë ureuëng tuha Bansa Atjèh. Bak uroë njoë ka neuwoë bak Allah ureuëng tjhik geutanjoë, gurèë njang peubleut mata bansa Atjèh nibak masa njang seupot seuhingga geutanjoë deuh ta kalon keulai pakriban ta meuhudep meurdehka, bah that pih meurdehka njan mantong hana bak djaroë teuh, teutapi ka na dalam hate teuh ileumèë njan. Ileumèë njan han ta lhi le, han djeuët ta ubah le, han djeuët ta lhat bak njang hana peureulèë. Bek ta lhat lagèë badjeuë ateuëh ranteng triëng njang akan djipot uleh angen ba dan hana meuho seutot lheuëh njan. Bah that pih djinoë ka djidjak peugah Tengku Tjhik di Tiro Hasan Muhammad njan geutem lagèë njang ka na di Nanggroë djinoë, njan sulét mandum. Hana alasan nibak gop njan geuteurimong peuë njang ka na djinoë. Peuëkeuh na tom geumarit lagèë njan? Peuë keuh na tom geutuléh lagèë njang ka teudjadi uroë njoë? Njan tjit haba djipeuna-peuna. Njang mandum haba sulét.
Deungon ka neuwoë Allahjarham Tengku Tjhik di Tiro Hasan Muhammad bak Allah kon meumakna ka maté bansa Atjèh. Geutanjoë hana maté, bansa Atjèh hana maté. Kon meumakna han akan maté. Meunjo geutanjoë sambong keulai peuë njang ka Tengku Tjhik di Tiro Hasan Muhammad keubah, ta meureunoë keulai peuë njang ka geupeureunoë keugeutanjioë. Meunjo getanjoë hana ta tem meureunoë le, hana ta tem peureumeun le, hana ta pakoë le peuë njang keuneubah Tengku Tjhik di Tiro Hasan Muhammad njan meumakna geutanjoë ka ta angkèë droë teuh lom djeuët keu lamiët bansa luwa teuka.
Geutanjoë han djeuët rhot seumangat deungon ka geuwoë bak Allah Tengku Tjhik di Tiro Hasan Muhammad. Geutanjoë pajah beumeutamah kha leubeh nibak njang ka ka. Geutanjoë beumeutamah beuhô nibak njang ka leupah. Geutanjoë beumeutamah gagah nibak jôh djameun dilèë. Beu tapeuleumah droëteuh beulagèë tjutjo éndatu teuh, beu lagèë éndatu teuh njang keumah geulawan musoh teuka. Pakriban éndatu getanjoë keumah geumeuprang hana geupijôh-pijôh rap 70 thôn geulawan peundjadjah teuka? Geutanjoë na lagèë njan? Bek deungon peng grik dua neuk njan sampoë geutanjoë ka ta meuseunoh peuë njang hana meu-ube seuma meu-untong keu bansa Atjèh. Deungon peng grik dua neuk njan ka meusigong-keunoë keudeh. Deungon boinah njang ube peudjet njan ka djak kheun keunoë keudeh, tjhot gateh ureuëng laen, djak peumanjang boh hidong ateuëh bansa Atjèh. Njan mandum sipheuët lamiët njang teudjadjah. Djak seumah tuan djih dan djak gidong bansa droë.
Uroë njoë ta peu-ingat uroë mangkat Tengku Tjhik di Tiro Hasan Muhammad deungon ta peugisa seumangat peumeurdehka droë teuh. Salah saboh narit njang keuramat lagèë na geukeubah uleh Tengku Tjhik di Tiro Hasan Muhammad keugeutanjoë nakeuh “Akan gadoh saboh-saboh bansa meunjo ka djipeuteuwo seudjarah djih”. Djinoë geutanjoë ta meureunoë keulai seudjarah geutanjoë, dari djameun masa éndatu getanjoë meunanggroë sampoë seudjarah njang ka geupeugot uleh Tengku Tjhik di Tiro Hasan Muhammad keu bansa geutanjoë. Seugohlom masa djeu-oh djidjak wadjeb ta peubeutoi peuë njang ka salah seugohlom salah njan meudjak leubeh djeu-oh ladju. Pajah ta beudoh djinoë ladju untuk peubeuna njan. Handjeuët ta meulaloë le.
Achirul qalam bak ta peu-ingat uroë mangkat Tengku Tjhik di Tiro Hasan Muhammad geutanjoë mandum ta beuët surat Al-Fatihah dan ta peusampoë pahala njan ukeuë Allahjarham Tengku Tjhik di Tiro Hasan Muhammad. Al-Fatihah
Ureuëng Tjhik Ideologis Atjeh (Deklarator GAM)
Syukri Ibrahim
Birô Peuneutrang
Meudjeulih GAM Pusat
