Assalamu’alaikum warahmatullah wabarakatuh
Uroe njoe geutanjoe ta peu-ingat Uroe Ulang Thon Peunjata Keulai Atjeh Meurdehka njang keu-48, 4 Desember 1976 – 4 Desember 2024.
Uroe njoe geutanjoe ta peu-ingat Uroe Ulang Thon Peunjata Keulai Atjeh Meurdehka njang keu-48, 4 Desember 1976 – 4 Desember 2024. Njoe ka leubeh nibak dua boh geuneurasi ka meupeudjak buet meusedjarah njoe. Geutanjoe han djeuet sagai-sagai ta peuteuwo seudjarah njang raja leupahna njoe. Bansa Atjeh wadjeb sabe-sabe ta-ingat dan ta peurajek uroe raja njoe deungon keuadaan njang meuteuntee-teuntee. Peuekeuh njang na di Nanggroe Atjeh, Asia, erupa, Amirika dan teumpat laen lom njang na hudep ureueng Atjeh. Tanggong djaweueb geutanjoe ta peurajek buet njoe. Meunjo geutanjoe hana ta peurajek buet njoe deungon peue lom meunjo hana ta peureunoe geuneurasi ukeue untuk peurajek buet njoe maka akan gadoh seudjarah njang that peunteng leupahna njoe.
Tengku Tjhik di Tiro Hasan Muhammad ka lheueh geupeunjata keulai Atjeh Meurdehka. Njan keuneubah geuh keu geutanjoe njang hudep watee njoe. Peukara njan ka djeuet keu seudjarah njang peunteng lagee na. Meunan seudjarah njoe ka le njang peuteuwo maka keuadaan seudjarah njoe djeuet keu alat musoh untuk peutabeue buet meurdehka njoe. Peue lom djinoe leu njang ta deungo dan djipeugot peunjata dikeue umum deungon hana le djipeugah Uroe Peunjata Keulai Atjeh Meurdehka. Ka djipeugah 4 Desember njan nakeuh uroe lahe saboh-saboh organisasi atau saboh badan njang djeuet peukong keukuasaan musoh njang na di Atjeh. Njan han djeuet sagai-sagai ta peutjaja dan pajah ta tulak deungon seukreueh-kreueh djih. Pajah peubateue deungon teunaga njang ube na bak geutanjoe.
4 Desember 1976 njan nakeuh seunambong nibak 3 Desember 1911. Peue njang teudjadi bak 3 Desember 1911 njan seuhingga djeuet keu peunteng lagee na? Uroe njan keuh Sjahid Wali Neugara keuseuneulheueh seugohlom geusambong uleh Tengku Tjhik di Tiro Hasan Muhammad, uroe sjahid Teungku Tjhik di Tiro Ma’at bin Muhammad Amin. Droeneuh njan sjahid bak watee muda that, umu geuh baro 16 thon watee njan. Bah that droeneuh njan ban trok baligh geuh mantong ka geuteu’oh meuhudep meurdehka dan meumate sjahid. Lheueh sjahid Teungku Ma’at Tiro djeuet ta kheun watee njan ka lagee hana le njang djeuet pimpin Atjeh. Maka deuh keuh dan teubleut keuh mata geutanjoe djinoe lheueh geupeubleut uleh Tengku Hasan di Tiro njang seubagoe peumimpin geutanjoe. Dan droeneuh njan keuh njang peutrang dan peuglah beuneung seudjarah njang meutju’et-tju’et lagee na njan. Beuta-ingat, 4 Desember njan kon uroe ulang thon organisasi, teutapi Uroe Peunjata Keulai Atjeh Meurdehka njang hana pat gop bantah njan.
Geutanjoe njang hudep djinoe pajah ta meureunoe lom dan lheueh njan ta peureunoe aneuk tjutjo teuh, lagee peue njang ka lheueh endatu geutanjoe peugot dan geupeureunoe lom keugeutanjoe uleh Tengku Tjhik di Tiro Hasan Muhammad. Deungon asas ileumee meurdehka nibak Tengku Hasan di Tiro njan geutanjoe ta meusaboh, ta peugot seueh, ta meu-ato dan ta peuseuleusoe buet meurdehka njoe. Han djeuet ta duek seungap. Pajah ta peugot peue njang keumah ta peugot, bah pih uroe njoe geutanjoe peugot deungon hana deuh gop kalon dilee, teuma meunjo kajem ta peugot akan leumah rajek bak mata gop. Han djeuet rhot seumangat dan beusapeue kheun. Meunjo hana sapeue kheun pajah ta duek pakat. Mita djalan njang got keu Neugara, Bansa dan Agama keu Nanggroe Atjeh.
Meusaboh, beusapeue pakat, bek mita tjungkeh bah njang hana patot. Bak musoh djawa njan ta mita tjungkeh bek sabe-sabe bansa teuh.
Hudep Beusare, Mate Beusadjan
Sikrak Gaphan, Saboh Keureunda.
Wassalamu’alaikum warahmatullah wabarakatuh
Tengku Musanna Abdul Wahab di Tiro
