ATJÈH MEURDÈHKA
Press Release ; Haba Peunjata 3. Juni 2024
Bismillahirahmanirrahim
Assalamu’alaikum warahmatullahi wabarakatuh
Keu Bandum Bansa Atjèh Mulia Ateuëh Rhuëng Dônja,
Uroë njoë 3 Djuni, 2024, ka 14 thôn ka Wali Neugara Teungku Tjhik di Tiro Hasan Muhammad ka neuwoë bak Allah Subhanahu Wa Ta`ala. Droëneuh njan geuteu`oh geumeuhudép dan geumeumaté geuh lagèë éndatu geuh. Gop njan beutôi-beutôi geumeumat lagèë èndatu droëneuh njang geupeuphôn uléh Tengku Tjhik di Tiro Muhammad Saman. Keuneubah Tengku Tjhik di Tiro Muhammad Saman njang geubungka, geu-ungki, geupeupham, geupeubuët, geupeureunoë dan geutinggai keu geutanjoë.
Si-umu droëneuh njan hudép ka geupeubuët buët njang leupah raja lagèë na. Seudjarah droëneuh njan ka lheuëh geutuléh njang djeuët keupeudôman geutanjoë ta meuhudép dalam ta tuntut Meurdéhka nibak peundjajah luwa teuka. Pakriban droëneuh njan geuwoë u Nanggroë dan geu-Peunjata Keulai Neugara Atjèh Meurdéhka, geukeubah ureuëng- ureuëng bako di Nanggroë, geupeubuët buët peurdjuangan di luwa nanggroë deungon geuba aneuk-aneuk muda Atjèh u luwa untuk geupeureunoë, seuhingga geutanjoe djeuët tameureunoë bak ureuëng keuneubah njan. Geutuléh meuplôh boh buku, geukeubah pidatô-pidatô dalam beuntuk audio dan video njang wadjéb geutanjoë meureunoë dan beutapeutamong dalam darah dan tuleuëng teuh.
Djinoë peuë njang patôt bansa Atjèh peubuët? Wadjéb bagi Bansa Atjèh tjok tanggông djaweuëb buët seunambông peurdjuangan njoë. Tengku Tjhik di Tiro Hasan Muhammad na geukeubah saboh narit dalam saboh Peundidékan Atjèh Meurdéhka “Meunjo geutanjoë beutôi-beutôi tjutjo éndatu teuh, geutanjoë wadjéb peugot lagèë éndatu teuh, beutateu`oh semiké, meuhudép dan meumaté seubagoë bansa meurdéhka”. Maka djinoë han djeuët ta peuseungap droë lé, beudoh beusanteut bahô beusaban ajôn, beusapeuë langkah dan beusapeuë kheun dalam peurdjuangan Atjèh Meurdéhka. Dumpeuë peukara djeuët ta peubuët deungon ta meupakat, ta meuduëk deungon njan akan ta tjok peuneutôh njang bidjaksana.
Bak uroë ta peu-ingat Allahjarham Tengku Tjhik di Tiro Hasan Muhammad njoë, ta meunarit “Peurdjuangan Atjèh Meurdéhka han akan maté deungon maté sidroë-droë ureuëng, si umu bansa Atjèh mantong na, peurdjuangan han akan maté”. Keuneubah droëneuh njan sabé na sadjan geutanjoë dan geutanjoë akan ta meumaté dalam Atjèh Meurdéhka.
Wabillahitaufiq walhidajah wassalamu’alaikum warahmatullahi wabarakatuh.
Hudép beusaré, maté beusadjan.
Biro Peuneurangan Atjèh Meurdéhka.
Keutuha,
Sjukri Ibrahim
Web. : https://freeacheh.org
E-mail : wareh@freeacheh.org
Mobilnr : +45 50 11 29 45
pdf 3.6:24
