Assalamu’alaikum warahmatullahi wabarakatuh
Bandum bansa Atjèh njang mulia ateuëh rhuëng dônja, seumoga sabé dalam peulara Po teuh Allah Subhanahu wa Ta ́ala.
Bandum pudjoë tapeuwoë ukeuë Po-teuh Allah, njang kabri nikmat hudép keu geutanjoë bak ta peudjak ibadah keu Droëneuhnjan. Selaweuët seureuta saleuëm ukeuë Pang Ulèë geutanjoë njang ka neubri tjeuntoh dan peuleumah rôt-uëh keu bandum ummat manusia ateuëh rhuëng dônja deungon Sunnah dan Sirah droëneuhnjan sibagoë peudoman dan meunumat dalam hudép, sabé-sabé sampoë geutanjoë woë bak Allah Njang Maha Kuasa.
Tiëp-tiëp uroë dalam hudép njang geutanjoë lalui sabé geujuë muhasabah droë teuntang buët-buët njang ka geutanjoë peubuët. Deungon harapan supaja peuë njang ka meuhasé beumeutamah djroh lom akan ukeuë dan peuë njang ka djeuët keu salah dan silap atawa kureuëng ôsaha geutanjoê, bèk meu-ulang lé dan beumeutamah gigèh lom bak ta ôsaha akan ukeuë.
Uroënjoë ka 18 thôn, ka lheuëh teudjadi saboh seudjarah njang ka meutuléh dan njan han djeuët talhi lé. Peuë keuh na beuna atawa salah dalam peuristiwanjan? Saboh hai njang ka na seupakat njang saban kheun, dan saboh peunutoih njang djeuët keukontra lé seubagian, ateueh kheundak Allah ka meutèkèn saboh pakat di Helsinki, Finlandia, bak 15 Agustus 2005, njang saban geutanjoe teupeuë geupeunan MoU Helsinki. Djinoë, keuseupakatannjan ka meu-umu toë deungon ukôran nibak saboh geuneurasi atawa keuturônan, ka lheuëh saban-saban ta kalôn dan saban-saban tarasa peuë njang ka teudjadi lheuëh meuteken njan? Mungkén
han séb watèë dan keureutaih bak ta tuléh bandum Djandji Helsinkinjoë deungon slogan atawa meunumat Peace and dignity for All – Damé njang beurmartabat keu bandum. Njan njang meutuleh dan djak peugah bak ureuëng. Njang njata teudjadi nakeuh hareukat dan martabat bansa Atjèh mantong hana mupat lom malah meutamah brat ladju-ladju sôsah hudèp keu bansa Atjèh dalam sigala bideuëng; bôh politék, sosial, ekonomi dan agama, peuë lom keu peukara makmu dan meurdèhka.
Ka leumah dan deuh trang lagèë na peue njang ka lheueh meuteken njan that djeuôh nibak peuê njang ka lheuêh Allahjarham Tengku Tjhik di Tiro Hasan Muhammad peugot seureuta njang ka gopnjan peureunoë geutanjoë. Teuma, uroënjoë njang peureulèë nakeuh geutanjoë mumat bak geunaréh njang ka neupeudông atawa njang ka neupeukong sibagoë warésan hukôm dan kredibelity bansa Atjèh uléh Allahjarham Tengku Tjhik di Tiro Hasan Muhammad dalam peudong dan Peunjata keulai Atjeh Meurdehka, njakni beutawoë bak prinsip landasan dasar seudjarah Atjèh njang panjang dan gilang geumilang. Ileumèë njan beudjeuët ta peutrén keu geunerasi barô uroënjoë. Antara laén tapeubeuët dan bri “Peundidékan dan Idiologi Atjèh” njang beutôi, seusuai deungon peutunj’ok Islam, seudjarah, adat dan budaja geutanjoë Atjèh.
Meunantjit dalam hai “Uroë 17 Agustus” njang pundjadjah Indonesia paksa bansa Atjèh khususdjih geuneurasi barô untôk djak peurajék uroë njoë, njan nakeuh uroë malang bagi geutanjoë bansa Atjèh. Peue seubab malang? Njoe beugeutanjoë mandum teupeue njang geutanjoë Bansa Atjèh hana rôh dalam watèë Djawa njan djipeugah droë djih ka djipeumeurdèhka droë bak thôn 1945 njan. Bèk ta kheun dônja laén njang manjoriti, Beulanda keudroë pih njang ka djidjadjah Djawa njan leubeh nibak 350 thon hana dji akui njan. Barô bak 2 November 1949 Beulanda ka djidjak seurah nanggroë-nanggroë njang dimijup djadjahan djih djidjok keu
Sukarno. Neugara Atjèh han djeuët djipeurôh dalam peukara djôk meudjôk njoê, seubab Beulanda hana keumah djipeutaklok Atjèh. Beulanda njan djipluëng dari Atjèh deungon hana djidjak gisa lé. Maka djih hana sah meunurôt bandum hukom peukara djidjak djok keudaulatan Atjeh keu Djawa njan. Meumakna geutanjoë teutap Meurdèhka. Meunan geutanjoë ka djipasoë dalam djadjahan barô Djawa njan ka ta kalon dan tarasa nibak uroënjoë, geutanjoë ka gadoh hareukat dan martabat sibagoë bansa njang meudèëlat dan beumartabat ateuëh rhuëng dônja. Njoë nakeuh seudjarah hitam dalam seudjarah Atjèh njang wadjéb ta tilék dan ta ôsaha ubéna daja, Atjèh beumeugisa lagèë sôt, mulia, makmu, aman dan bermeurtabat lagèë djameun èndatu geutanjoë.
Rot-uëh dan tjeunto njang ka geupeuleumah lé èndatu, nakeuh warésan keuneubah njang ka geu-uké ngon darah keuseutiaan keupahlawanan seurta meubagoë kureubeuën. Geutjah, geukeubah, geujuë papah magat djeuët tapeudjaroë keu keuturônan ukeuë. Tinggai saban-saban ta seutôt djalannjan deungon peunoh keusabaran, bidjaksana, musjawarah dan seusuai deungon keuadaan djinoë. Nibak ta sambôt atjara njang hana meumakna sapeuëpihnjan, leubèh djroh ta meudo’a keu arwah bansa teuh dari djameun sjuhada èndatu sampoê ‘an sjuhada GAM dan ureuëng tjhikteuh, sjèëdara teuh njang ka hana lé atawa njang mantong na ,beu Allah bri keu geutanjoë keukuatan njang amanah, mangat djeuët tapeuriwang dèëlat nanggroë seurta hak hudép meurdèhkateuh njang ka gop rampok dan peuduëk geutanjoë keu lamiët.
Seumoga Allah neubantu geutanjoë dan neubri peutunjok djalan njang hak dan neupeuhantjô njang bathil.
Wassalamu’alaikum warahmatullahi wabarakatuh
𝐊𝐚𝐧𝐭𝐨 𝐀𝐭𝐣𝐞𝐡̀ 𝐒𝐮𝐦𝐚𝐭𝐫𝐚 𝐌𝐞𝐮𝐫𝐝𝐞𝐡̀ 𝐤𝐚é 𝐁𝐢𝐫𝐨 𝐏𝐞𝐮𝐧𝐞𝐮𝐫𝐚𝐧𝐠𝐚𝐧 & 𝐈𝐧𝐟𝐨𝐫𝐦𝐚𝐬𝐢
𝐀𝐭𝐣𝐞𝐡̀ 𝐌𝐞𝐮𝐫𝐝𝐞𝐡̀ 𝐤𝐚 𝐒𝐭𝐨𝐜𝐤𝐡𝐨𝐥𝐦 𝐒𝐰𝐞𝐝𝐞𝐧
